نكت مغربية %100

هادي واحد البنت وصلات المدرسة معطلة
قال ليها الاستاد: مالكي تعطلتي؟
قالت ليه: راه واحد كان كيتبسل عليا و تابعني
قال ليها المعلم: إيوا إيلا كان شي واحد تابعك غادي توصلي دغية ماشي تعطلي
قالت ليه: راه هو اللي كان كيتمشى بشوية

واحد المعلم قال للتلاميد دياولو: اللي حاس براسو مكلخ يوقف
سكتوا التلاميد كاملين إلا واحد ناض وقف
قال ليه المعلم: حاس براسك مكلخ؟
قال ليه التلميد: لا، غير ما بغيتكش تبقى واقف بوحدك

هادا واحد الزقرام  كيقرا ف محو الأمية. سولو المعلم قال ليه: 60+60 شحال كتساوي؟
قال ليه السقرام : 120  
وهو يقول ليه المعلم: مالك البارح قلتي للمفتش 140؟
أو هو يقول ليه الزقرام: راه زدت عليه حيت هو ماشي من الكليان ديالي

هادي واحد البنت نص ساعة وهي كتهدر ف التلفون.
مللي سالات قالت ليها ختها: على سلامتك! كي درتي ساليتي ف نص ساعة؟ عادة كتشدي التلفون ساعتين
قالت ليها البنت: اه، راه غير النمرة غلط

برغوت وبرغوتة كانوا ف السينيما. ملي سالى الفيلم و بغاو يمشيو للدار، قال البرغوت للبرغوتة: فيك ما يتمشى أولا نركبوا شي كلب؟

هادا واحد البورطابل دار مع واحد البوطابلة باش يتلاقاو، ساعة تعطل عليها
قالت ليه البورطابلة: أش هاد التعطيلة؟
قال ليها البوطابل: واحق الريزو اللي بناتنا إيلا غي كنت كنتشارجا

هادا واحد غير دخل الامتحان ديال الباكالوريا و دغية خرج.
قالو ليه: مالك خرجتي دغية؟
قال ليهوم: قال ليا الوالد جي نتا اللول

هادا واحد مشات ختو تولد وشداتو الخلعة وتالف. سولوه: أشنو غادي يتزاد عندكوم؟
قال ليهم: إيوا هاد الساعة مازال ما عرفت واش غادي نولي خال أولا خالة

هادا واحد مشى للسوق بغى يبيع قنية، وهو يجي عندو واحد خينا مبوق وقال: بشحال القرد؟
قال ليه مول القنية: أسبحان الله، راه قنية هادي
قال ليه المبوق: ما هدرتش معاك، هدرت مع القنية

هادا واحد مبوق سولوه: أشنو رأيك ف الزواج المبكر؟
قال ليهم المبوق: زعما أشمن ساعة بالضبط؟

واحد الولد سول ماماه: ماما، أشنو كيعني ملاك؟
قالت ليه ماماه: الملاك مخلوق من نور وكيطير.
قال ليها الولد: وعلاش قال بابا للسكريتيرة ديالو يا ملاكي؟
قالت ليه ماماه: ما ديرش ف بالك، من غدا غادي تطير

 

واحد الراجل سميتو مبارك، شرى حولي ودخل بيه الدرب
شافتو جارتو من الشرجم، وقالت ليه: مبارك الحولي
قال ليها: خدوج النعجة

 

هادي واحد المرا بغات تركب طاكسي وهي تسول مولاه: بشحال أولدي كتدي لحي المقاومة؟
قال ليها: 15 درهم
قالت ليه: والسيكان؟
قال ليها: السيكان فابور
قالت ليه: إيوا هاك أولدي دي ليا هاد السيكان هاني غادي نلحق بيك على رجلي

 

هادا واحد عندو واحد الكتكوت مفترس. كيديرو مع الدجاج كياكل ليه الدجاج. دارو مع الحوالا خرج ليه على الحوالا. دارو مع البقر، لقاه فرتك ليه البقر. الراجل طلع ليه الدم وهي يدي داك الكتكوت رماه ف الصحرا
 مللي دازو 3 ايام، الراجل بقى فيه الكتكوت قال يمشي يطل عليه. مللي وصل للصحرا لقاه مرمي ف الرملة والنسور كيحومو عليه. جرا عندو الراجل وقال ليه: مييييمتي الكتكوت ديالي مات
قال ليه الكتكوت : الله يعطيك الويل خرجتي ليا على البلان

 

هادا واحد المعلم قال للتلاميد دياولو: سولوني أي سؤال وإيلا ما عرفتش نجاوب عليه نعطيكم 100 درهم، وإيلا سولتكوم أنا سؤال وما عرفتوش تجاوبوا عليه عطيوني 50 درهم
الدراري تخلعوا حتى من المجتهدين. شوية ناض الدمدومة ديال القسم رفع صبعو وفرع للمعلم راسو حتى خلاه يهدر، قال ليه المعلم: زيد كاع أشناهو السؤال ديالك؟
قال ليه الكسول: أشناهي الحشرة اللي عندها 9999 رجل؟
المعلم عيا ما يفكر ما عرفش الجواب. وهو يعطي للكسول 100 درهم كيفما اتافقو
ناض المعلم سول الكسول: يالله قول لينا نتا أشناهي هاد الحشرة اللي عندها 9999 رجل؟
قال ليه الكسول: والله أودي ما عرفت، وهو يعطي للمعلم هاديك 100 درهم وقال ليه: هاك هادي، خود 50 درهم ورد علي 50 درهم ديالي

 

هادا واحد مبوق وصل حدا البوتو ديال الضو وبدا يدق يدق يدق، يصحاب ليه واش دارهم
جا عندو واحد آخر مبوق كتر منو، قال ليه: أشنو كدير أصاحبي؟
قال ليه المبوق اللول: كندق على دارنا وحتى واحد ما حل ليا
طلع المبوق لاخور راسو وهو يقول لصاحبو: إيوا العجب... راهوم شاعلين الضو زعما

 

هادا واحد عندو تلاتة د الشعرات ف راسو. مشى عند الحلاق وقال ليه: دير ليا فرقة من الجنب
الحلاق جا يدير ليه الفرقة من الجنب تقطعات ليه واحد الشعرة
قال ليه الراجل: واخا دي ليا الفرقة ف النص
الحلاق جا يدير ليه الفرقة ف النص تقطعات ليه شعرة أخرى
قال ليه الراجل: عرفتي أشنو تدير؟ دير ليا تشويكة